ڕادیۆ زەمانە کە ڕادیۆیەکی بێلایەن و سەربەخۆیە و بە زمانی فارسی بەرنامەکانی بڵاو دەکرێتەوە، لە ڕۆژانی ڕابردوودا کاتژمێرێک بەرنامەکانی خۆی تەرخان کرد بۆ ناوەرۆک و کار و چالاکییەکانی ناوەندی نەمران و وتووێژێکی دەگەڵ نوێنەری ئەو ناوەندە پێکهێنا و تێیدا گەنگەشەی دەستکەوت و پلانەکانی داهاتووی ئەو ناوەندەیان کرد. ئەو ڕادیۆیە لە ماڵپەڕی فەرمیی خۆیاندا ئاوا دەنووسن:
زیاتر لە چوار دەیە لە تەمەنی کۆماری ئیسلامی ئێران تێدەپەڕێ و لە درێژەی ئەو ماوەیەدا کۆماری ئیسلامی ئێران بە دڕەندانەترین شێوە خەڵکی کوردستانی قەڵاچۆو کردووە و کوردی بە شێواز گەلی جۆراوجۆر زیندانی و لەسێدارە و تیرباران کردووە.
لەو دوییانەدا پڕۆژەیەک بە ناوی «نەمران» بە مەبەستی بەڵگەمەند کردنی پێشێلکاریەکانی مافی مرۆڤ لە ڕۆژهەڵاتی کوردستان و کۆکردنەوەی بەڵگە لە سەر تیرباران کراوان و لەسێدارە دراوانی کورد لە لایەن کۆمەڵێک کەسایەتی لە ئەندامانی بنەماڵەی نەمران و رۆژنامەوانان و چالاکانی مافی مرۆڤ دامەزراوە و دەستی بە چالاکی کردووە.
«ناوەندی نەمران» بۆ کۆکردنەوەی بەڵگە وزانیاریی لەسەر لەسێدارەدراوان، تیرەباران کراوان و برزکراوانی ڕۆژهەڵاتی کوردستان لە ئاکامدا تێدەکۆشێ دۆسییەی قانونی بە دژی تاونباران و بەرپرسانی کۆماری ئیسلامی ئێران لە دادگاکانی نێونەتەوەیی، بێلایەن وسەربەخۆی مافەکانی مرۆڤ تۆمار و وەگەڕی بخات.
ڕادیۆ زەمانە بۆ زیاتر ناسینی «ناوەندی نەمران» لە گەڵ دیاکۆ موردای، ڕۆژنامەوان و چالاکی مافی مرۆڤ و یەکێک لە بەڕێوبەرانی ئەو ناوەندە وتووێژێکی ساز داوە. فەرموون بۆ بیستنی وتووێژەکە.
