ئەمڕۆ هەینی ڕێکەوتی ٨ی بەفرانباری ساڵی ١٤٠٢ لە بەندیخانەی ورمێ سێ بەندکراوی کورد بە ناوەکانی وەفا هەنارە، ئارام عومەری بەردیانی و ڕەحمان پەڕحازوو بە تاوانی سیخوڕی کردن بۆ ئیسڕائیل لەسێدارە دران. کاربەدەستانی زیندانەکە و بەرپرسانی دادگای شۆڕشی ئەو شارە بە بنەماڵەکانیان ڕاگەیاندووە کە تەرمی ئەو ئێعدامکراوانە نادرێنەوە بە بنەماڵەکانیان.
ڕێکخراوی هەنگاو پێشتر بڵاوی کردبۆوە کە: ئەو سێ گیراوە کوردە لە کۆتایی مانگی ڕێبەندانی ١٤٠١ لەلایەن لقی سێی دادگای شۆڕشی ئورمیە بە سەرپەرەستی قازی نەجەفزادە بە تۆمەتی بەشداری لە هاوکاری پێدانی زانیاری و سیخوڕی بۆ ئیسرائیل سزای سێدارەیان بەسەردا سەپێندرا.
ناوەندی نەمران ئەو کردەوە نامرۆڤانەیە و ئێعدامی ئەو سێ هاووڵاتییە و پێنەدانەوەی تەرمەکانیان بە بنەماڵەکانیان بە کارێکی نامرۆڤا و دەزانێت و پێشێلکارییەکی زەقی مافی مرۆڤە و مەحکومی دەکات. داوا لە گشت ڕێکخراوە جیهانییەکان دەکات تا لە هەوڵێکی تۆکمەدا هەوڵ بدەن سنوورێک بۆ ئەو پێشێلکارییانەی کۆماری ئیسلامی ئێران دابنێن.
